KRUGER WILDTUIN EN DIE KANADEES (2)

Dit was… soos gewoonlik in die wildtuin… ‘n wonderlike naweek! Tussen Vrydagmiddag eenuur en Saterdagoggend negeuur het ons die Groot Vyf en die Lelike Vyf (bobejaan, aasvoël, vlakvark, blouwildebees en krokkedil) in al hul glorie gesien! Onder andere drie luiperde! (of is dit luiperds?) 

Die Kannadees het ge-“Oh my God!” tot ons daar uit is!

Van die eerste impala is omtrent ‘n honderd fotos geneem… min het sy geweet hoeveel impalas sy nog oor die naweek sou sien!

Haar eerste ontmoeting met Suid-Afrikaanse kos was melktert by Afsaal. Nou nie so lekker soos vroutjie-doutjie dit maak nie maar nie te onaardig nie. 

Sy was mal oor die sewedae verouderde steak van Paizes se slaghuis wat ons saamgevat het maar die gemarineerde varkrib het haar nie beïndruk nie. Waarvan sy wel baie gehou het was Vroutjie-doutjie se krummelpap! Snaaks dat die buitelanders so baie van pap hou? Doggie se Ierse vriend is net so ‘n pap entosias!

Die koeksisters wat ons saamgevat het is uit die rondawel se yskas gesteel (welkom in Suid Afrika) maar ek het Woensdag voor ons vergadering by Spar ‘n dosyn gekoop. Sy moes daarvan gehou het want toe die vergadering verby is was die koeksisters ook klaar!

Sy het gister op haar facebook blad die volgende gepos:

“Back safe and sound from Africa, man that is God’s country for sure. Unbelievable experience, I will post some of the 1200 photos I took soon! Can’t wait to go back!”

KRUGER WILDTUIN EN DIE KANADEES

Vrydag is ons oppad! 

Vyfuur Vrydag oggend kry ek Kollega by OR Tambo. Sy het gevra dat sy net gou, voor ons vertrek, kan stort en ander klere aantrek. ‘n Redelike versoek, in aanmerking geneem dat sy pas ‘n veertien uur vlug van Singapoer agter die rug het! OR Tambo is 7 km van ons af. So, as sy opgevars het kan ons vertrek! Ek wil nie graag later as 9h00 ry nie wat dit is drie en ‘n half uur se ry tot by Malelane in dan 64km tot by Skukuza!

Dan… Haar eerste Suid Afrikaanse braai!

Sy is ‘n Kanadees. Die vorige twee geleenthede wat ons kolegas Wildtuin toe geneem het was hulle Australianers… so asof dit bietjie makliker was… hulle is baie soos ons… eet rooivleis en kuier hard!!! (Die personeel van ons Singapoer kantoor kom van regoor die wereld.)

Ons het (baie subtiel) probeer uitvind wat eet sy (of wat eet sy nie) – antwoord: Sy eet enigeiets behalwe insekte en diere binnegoed (so much for “afval” en “mompanie wurms”)

Sovêr op die spyskaart:

“Aged steak” die slagter het dit goed laat oudword

Sosaties

Varksuster (ontbeente gerookte varkrib wat in lang stukke gesny is en gevleg is)

Mieliemeel vir pap

Brood/tamaties/uie vir braaibroodjies

Amarula

en natuurlik CASTLE

Wyn uit die kaap

Biltong

Droë wors (hulle het dit laas meatsticks genoem)

Chakalaka

Beskuit

Koeksisters

Laatweet wat kan ons haar nog eg-Suid-Afrikaans voer?

(will keep you posted)