Die Begin

 

Ons het nog altyd ‘n voorliefde om mense te onthaal. Rondry- en kuiermense is ons nie eintlik nie. Ons geniet dit meer om by ons huis te kuier en onthaal. In die meeste gevalle is daar gewoonlik ‘n lang redekawel oor hoe formeel die onthaal gaan wees. Vroutjie-doutjie hou voet by stuk dat daar tafel gedek moet word met blomme en kerse en die hele gedoente. Ek voel dat die informele om die vuur eet die lekkerste is. Dit is seker nodeloos om te sê dat ek die geveg gewoonlik verloor en ons mense meer formeel onthaal as wat ek sou verkies. Ek sal dit nou nie hardop erken nie maar met nabetragting moet ek gewoonlik erken dat sy tog reg was. As daar nou een ding is waarmee ek nie regkom nie is die om met ‘n papierbord op my skoot te eet.

In, wat ons graag na verwys as die ou dae, toe ons as brandarm pasgetroude paartjie in ‘n woonstel in Middelburg gebly het, het ons graag van die ander woonstel bewoners genooi vir ete. Omdat die woonstelblok se inwoners almal jonggetroude paartjie of afgetrede mense van die laer inkomstegroep was en dit almal net so skraps soos ons gehad het, kon ons sonder op duur te onthaal, ons verbeelding en vindingrykheid gebruik om armoede ‘n verrassende ete saam te flans wat baie geniet is sonder dat iemand gedink het dit is minderwaardig. In daardie dae was die Allegaartjie ‘Mixed-grill’ ‘n groot gunsteling. Dit het dan bestaan uit ‘n eier, stukkie boerewors, steak, skaaptjop, aartappelskyfies en ‘n mengelslaai. As jy bietjie moeite met die voorbereiding doen soos om die steak eers bietjie te marineer of ’n lekker peper sousie daarmee saam te maak of die tjoppie te dokter met ‘n kruie en parmesaan-kombersie kan dit ‘n gewone ‘Mixed-Grill’ omtower in iets besonders.

Hier is ’n lekker resep vir ‘m Peper Sous vir die steak en die Kruie en Parmasaankombersie vir die skaap tjops:

PEPER SOUS vir STEAK

1 eetlepel botter of margarien

1 koppie room

1 eetlepel mosterd

1 eetlepel vars gemaalde swart peper

1 dop branderwyn

Bietjie meel in kouewater opgelos as die sous te dun is.

Maak die sous sommer in die pan waarin jou steak gaargemaak is of as jy die vleis op die vuur gaan gaarmaak, steel so stukkie vleis van die grootste stuk steak af en braai dit vooraf met jou botter of margarien in jou pan waarin jy die sous wil maak.

Draai die hitte op medium en roer die peper, mosterd en brandewyn daarin vir so twee na drie minute daarin om al die geur uit die pan op te tel. Roer die room by, laat die ’n rukkie prut.

Gooi dit oor die steak net voor jy dit voorsit.

KRUIE EN PARMASAANKOMBERSIE VIR SKAAPTJOP

1 teelepel Parmasaan per tjop

1 teelepel vars basilkruid per tjop

1 teelepel pietersielie per tjop

1 teelepel harde roosterbrood (dit is sowat een sny vir vier tjops)

Maat alles in jou voedsel verwerker fyn.

Braai die skaaptjop soos jy en jou gaste daarvan hou, skep die mengsel oor die tjops en sit voor.


In my jongdae het ek my altyd vervies vir die mense wat die ou dae so geheilig het. Vandag is ek een van die mense wat terug dink aan die goeie ou dae! Vroutjie-doutjie en ek het al meer as eenkeer terug verlang na die ou dae, toe ons pasgetroud en brandarm was en tog heerlike geregte vir net ons twee kon opdis.

Ek het middae by die huis gekom en aangesit aan ‘n tafel met kos voorberei vir ‘n koning. Die vleis was smaak voorberei en die groente is voorgesit is ‘n vlekvryestaal opskepbakkie met afskortings vir elke groentesoort. So nou en dan het ‘n lekker nagereg die ete afgerond.

In retrospeksie die begin dae van ons huwelikslewe lag ons baie oor die innoverende metodes wat ons gebruik het om dinge te doen!

Omdat daar net nie geld was om elke nou en dan ‘n koeldrank te koop nie moes ons maar ‘n alternatief prakseer. In vroutjie-doutjie se ou skool boekprysresepteboek was ’n maklike gemmerbier resep. Hierdie resep het ons lank gebruik om gemmerbier te maak. Later het ons ‘n bietjie moeg geraak vir gemmerbier, maar weereens, aan vindingrykheid het ons nie tekort geskiet nie. Ons het gou uitgevind dat die roomysverkoper, wat elke middag met sy fiets met die groot roomys kas voorop, by die woonstelblok verby geklokkie het, ‘n groot liefde vir gemmerbier gehad het. Hy het glad nie gehuiwer om ‘n paar roomyse vir ‘n liter gemmerbier te ruil nie. Op warm dae het ons sommer ‘n hele karton met sowat tien roomyse vir ‘n liter gemmerbier geruil.

Gemmerbier

3 koppies suiker

3 lt. kook water

3 lt. koue water

3 tl Jamaikagemmer

1 koekie saamgepersde suurdeeg

Los die suiker in die 3 lt. kookwater op. Gooi die koue water by en roer deur. Indien dit nog baie warm is, laat afkoel tot lou. Voeg die Jamaikagemmer en suurdeeg by en roer tot die suurdeeg opgelos is. Laat staan vir twaalf ure op ‘n warm plek om te gis. Moet nie die bottel in die gis proses toe kurk of ‘n prop op draai nie. Die bottel sal ontplof.

Later het ons nog ‘n makliker gemmerbier resep gekry wat net soos Ouma se gemmerbier geproe het –

Sweeto Gemmerbier

1 botteltjie Sweeto (200ml)

2 koppies suiker

8 liter lou water

1 25g koekie saamgeperde suurdeeg

2 stokkies kaneel

2 hande vol rosyntjies

Los die suiker en die suurdeeg in die lou water op. Voeg die res van die bestanddele by en roer goed. Laat vir 24 uur op ‘n warm plek staan. Gooi deur ‘n moeselien doek, verkoel en drink. Pasop weereens om nie die bottel in die gistings proses toe te kurk of toe te draai in. Sit eerder ‘n stukkie plastiek sak liggies oor.

Advertisements

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Verander )

Twitter picture

Jy lewer kommentaar met jou rekening by Twitter. Log Out / Verander )

Facebook photo

Jy lewer kommentaar met jou rekening by Facebook. Log Out / Verander )

Google+ photo

Jy lewer kommentaar met jou rekening by Google+. Log Out / Verander )

Connecting to %s